Баткен облусунун Сүлүктү шаары боюнча 2020-жылдын 17-июлуна карата коронавирус жуктуруп алган жарандардын эң алгачкылары айыгып, үйлөрүнө чыгарылды.
Бейтаптар үйүнө кайтып жатышат
Сүлүктү шаарындагы жалпы дарыгерлердин практикалык борборунун директору Асат Ибрагимов: «Коронавирус жуктуруп алып, дарыланып жаткан жарандардын ичинен 2020-жылдын 17-июлуна карата өпкө сезгенүүсү менен ооругандардан 5 жаран, ковид-19 менен ооруп жаткан 4 жаран, айыгып, үйлөрүнө чыгарылды»,- деп маалымат берди.
Бейтаптар айыгып чыгып жатышат
«Жумуш деп жүрүп байкабай коронавирус жуктуруп алган экенмин, врачтардын, жалпы эле медицина кызматкерлеринин жардамы менен айыгып, мына үйгө чыгып жатамын, эч ким оорубасын, маска таккыла»- дейт Сүлүктү шаарынын Бөкөнбаев көчөсүнүн тургуну Жороева Шарапат.
«Тагдырдын жазганы экен, байкабай вирус жуктуруп алган экенмин, өпкөм сезгенип ооруп калдым. Медицина кызматкерлери, күнү-түнү менин оорум менен күрөшүп, жакшы болуп калдым. Мени менен чогуу жаткан оорулар 5 киши бардыгыбыз айыгып чыгып жатабыз»- дейт Сүлүктү шаарынын тургуну Ильяз Айдаров.
Кычкылтек концентраторлор алынып келинип жатат
Жергиликтүү бийлик вирусту жуктуруп алган бейтаптарга канчалык деңгээлде шарттарды карап жатат?
Барчынай Алимова
